Ra’iisul Wasaare Xamsa oo qaabilay wafdi ka socda Dowladda Qatar

Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa qaabilay wafdi sare oo ka socday Dowladda Qatar, oo uu hoggaaminayay La-taliye Sare, ahna Agaasime ka tirsan Wasaaradda Arrimaha Dibadda Qatar, Mudane Talaal Binu Rashiid Al-Hajri.

Wafdiga oo dalka u joogay arrimo la xiriira maalgashiga wax-soo-saarka cuntada iyo dhanka caafimaadka, isla markaana shalay heshiis dhinacyo badan ah la saxiixday Wasaaradda Qorsheynta, Maalgashiga iyo Horumarinta Dhaqaalaha, ayaa salaan sharafeed ugu yimid Ra’iisul Wasaaraha, iyaga oo la wadaagay farriimo ay ka wadeen madaxda dalkooda.

Ra’iisul Wasaare Xamsa ayaa wafdiga, oo uu wehliyay Safiirka Qatar u fadhiya Soomaaliya, uga warbixiyay horumarrada waaweyn ee Dowladda Federaalka ay ka samaysay dhinacyada amniga, kor u qaadista dhaqaalaha iyo adeegyada dadweynaha, isaga oo sidoo kale bogaadiyay xiriirka diblomaasiyadeed iyo iskaashiga xooggan ee ka dhexeeya Soomaaliya iyo Qatar.

- DHAMMAAD -
Cabdinaasir Axmed Bashiir
Afhayeenka Xukuumadda, ahna
Agaasimaha Warfaafinta iyo Xiriirka Dadweynaha, XRW
E-mail: media@opm.gov.so
Tel: +252 771 770 958
Facebook: https://www.facebook.com/OPMSomalia