Ra’iisul Wasaare Ku-xigeenka Labaad oo guddoomiyey kulanka u diyaar-garowga is-afgaradyada iskaashiga Somalia iyo Qatar

Ra’iisul Wasaare Ku-xigeenka Labaad ee Xukuumadda Jamhuuriyadda Federaalka Soomaaliya, Mudane Jibriil Cabdirashiid Xaaji Cabdi, ayaa maanta guddoomiyey kulanka u diyaar-garowga is-afgaradyada iskaashiga (MoUs) ee Soomaaliya iyo Qatar. Kulanka ayaa looga hadlay diyaarinta iyo dardar-gelinta is afgaradyada dhinacyada kala duwan ee muhiimka ah ee ay kala saxiixanayaan labada dalka, kuwaas oo ay ka mid yihiin; •⁠ ⁠Iskaashiga Difaaca •⁠ ⁠Dhalinyarada & Ciyaaraha •⁠ ⁠Waxbarashada Sare & Dhaqanka •⁠ ⁠Warbaahinta •⁠ ⁠Maaliyadda (Cashuuraha & Kastamka) Ra’iisul Wasaare Ku-xigeenka, ayaa xusay in heshiisyadani ay qayb ka yihiin dadaallada Xukuumadda DanQaran ee lagu xoojinayo iskaashiga caalamiga ah, lana doonayo in si toos ah loogu turjumo adeegyo iyo fursado shacabka Soomaaliyeed. Sidoo kale, waxaa jira heshiisyo wali socda oo ku saabsan Deegaanka & Isbeddelka Cimilada, Amniga Gudaha, Iskaashiga Tacliinta Sare, iyo Beeraha iyo Amniga Cuntada, kuwaas oo lagu xallinayo dhinacyada ka harsan ka hor saxiixa rasmiga ah. — Dhammaad —