Ra’iisul Wasaare ku xigeenka labaad oo kormeeray Waddooyinka roobku waxyeeleeyey

Ra’iisul Wasaare Ku-xigeenka Labaad ee Xukuumadda Jamhuuriyadda Federaalka Soomaaliya, Mudane Jibriil Cabdirashiid oo hoggaaminayey guddi ka kooban heer wasiirro, gobol iyo hey’adda SoDMA, kuwaas oo uu magacaabay Ra’iisul Wasaaraha Xukuumadda Jamhuuriyadda Federaalka Soomaaliya Mudane Xamsa Cabdi Barre, ayaa kormeer ku tagey qaar kamid ah goobihii ay saameynta ku yeesheen roobabkii mahiigaanka ahaa ee xalay ilaa saakay ka da’ayey caasimadda. Goobaha ay kormeerka ku tageen guddiga oo ay kamid yihiin, Iskool Buluusiya, waddada isku xirta garoonka Aadan Cadde iyo KM4 iyo waddooyinka uu burburka soo gaaray, ayaa waxa ay u kuurgaleen baaxadda burburka, si looga jawaabo khasaaraha ka dhashay. Ra’iisul Wasaare Ku-xigeenka, ayaa sheegay in roobabku ay geysteen khasaarooyin kala duwan oo isugu jira naf iyo maal isla markaana uu saameyn xooggan ku yeeshay ganacsiga iyo isku socodka magaalada, isaga oo uga mahadceliyey hey’addihii gurmadka fidiyey ilaa xalay. Waxa uuna intaas ku daray in Xukuumadda DanQaran oo ay kaalinteeda ka qaadan doonto maareynta khasaaraha uu sababay roobka. — Dhammaad — Wixii Faah-faahin ah kala xiriir Afhayeenka Xukuumadda, ahna Agaasimaha Warfaafinta iyo Xiriirka Dadweynaha XRW Farxaan Maxamed Jimcaale farhan.jimale@opm.gov.so media@opm.gov.so Muqdisho, Soomaaliya https://opm.gov.so/ https://www.flickr.com/photos/opmsomalia/