Ra’iisul Wasaare ku xigeenka XFS oo xilka u kala wareejiyey Wasiirka Cusub ee Wasaaradda Shaqada iyo wasiirkii hore

Ra’isul Wasaare ku xigeenka Xukuumadda Jamhuuriyadda Federaalka Soomaaliya Mudane Saalax Axmed Jaamac ayaa xilka u kala wareejiyey Wasiirka cusub ee Wasaaradda Shaqada iyo arrimaha bulshada Mudane Saalim Caliyow Ibrow iyo Wasiirkii hore Mudane Yuusuf Maxamed Aaden. Ra’iisul Wasaare ku xigeenka ayaa tilmaamay in Wasaaradda Shaqada iyo Arrimaha bulshada ay kamid tahay Wasaaradaha muhiimka u ah Qaranka isagoo u rajeeyay Wasiirka cusub inuu dhamaystiro qorshooyinka Xukuumadda DanQaran ee ku aaddan horumarinta arrimaha bulshada. Iyo shaqo abuurka dhallinyarada oo qeyb weyn ka qaadan doona, hormarinta Dhaqaalaha,amniga iyo dib u dhiska. Mudane Saalax ayaa u mahad celiyey Wasiirkii hore ee Wasaaradda sidii xilkasnimada lahayd ee uu ugu adeegay qarankiisa muddadii uu xilka hayey, waxa uuna Alle uga baryey Wasiirka cusub in uu u fududeeyo masuuliyadda adag ee loo igmaday. ——— DHAMMAAD———-