𝐑𝐚’𝐢𝐢𝐬𝐮𝐥 𝐖𝐚𝐬𝐚𝐚𝐫𝐞 𝐗𝐚𝐦𝐬𝐚: 𝐢𝐬𝐥𝐚-𝐱𝐢𝐬𝐚𝐚𝐛𝐭𝐚𝐧𝐤𝐚 𝐢𝐲𝐨 𝐪𝐢𝐢𝐦𝐞𝐲𝐧𝐭𝐚 𝐰𝐚𝐱𝐪𝐚𝐛𝐚𝐝𝐤𝐮 𝐰𝐚𝐚 𝐭𝐢𝐢𝐫 𝐦𝐮𝐡𝐢𝐢𝐦 𝐮 𝐚𝐡 𝐡𝐮𝐟𝐧𝐚𝐚𝐧𝐭𝐚 𝐝𝐨𝐰𝐥𝐚𝐝𝐧𝐢𝐦𝐚𝐝𝐚
Muqdisho, 13 Sebteembar 2026:-Munaasabadda sanadlaha ah ee Banbaxa Golaha Wasiirrada, oo uu Ra’iisul Wasaaraha Jamhuuriyadda Federaalka Soomaaliya, Mudane Xamsa Cabdi Barre, kagala xisaabtamo Wasaaradaha iyo Hay’adaha Dowladda waxyaabihii u qabsoomay sanadkii tagey, ayaa waxaa ka qeyb galay Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud.
Ra’iisul Wasaaraha Xukuumadda, Mudane Xamsa Cabdi Barre, ayaa adkeeyey in isla-xisaabtanka iyo qiimeynta waxqabadku ay yihiin tiir muhiim u ah hufnaanta dowladnimada, isaga oo Wasaaradaha iyo Hay’adaha ku boorriyey in ay sii laba-jibbaaraan dadaallada lagu gaarsiinayo shacabka adeegyo tayo leh.
Madaxweynaha Jamhuuriyadda Federaalka Soomaaliya, Dr. Xasan Sheekh Maxamuud, ayaa Xukuumadda DanQaran ku ammaanay horumarka iyo guulaha ay ku hoggaamisay dalka muddadii afarta sano ahayd ee ay shaqeyneysay.
Madaxweynaha ayaa xusay muhiimadda ay leedahay isla-xisaabtanka joogtada ah, qiimeynta waxqabadka hay’adaha dowladda iyo dardargelinta qorshayaasha lagu xaqiijinayo adeegyada iyo horumarka dalka.
“Xukuumadda waxaa laga rabaa in cidda dadaalka iyo waxqabadka la timaadda lagu abaalmariyo, oo aysan isku mid noqon qofka dadaalay iyo kan gaabiyey. Maanta halka aad joogtaan waa meel aad uga sarreysa halkii shalay la joogay. Waad ku amaanantihiin dadaalka iyo waxqabadka aad muujiseen” ayuu yiri Madaxweyne Xasan Sheekh.
Madaxweynaha, ayaana bogaadiyey waxqabadka wanaagsan ee ay muujiyeen Wasaaradaha, isaga oo sidoo kale soo dhaweeyey adeegsiga nidaamyada danabaysan ee lagu maareynayo laguna qiimeynayo waxqabadka Dowladda. Madaxweynaha ayaa adkeeyey muhiimadda ay leedahay in la sii xoojiyo hannaanka casriga ah ee maamulka waxqabadka, si qorshayaasha Dowladda loogu beddelo natiijooyin la cabbiri karo oo wax-ku-ool u ah shacabka Soomaaliyeed.
Munaasabadda ayaa sidoo kale lagu soo bandhigay horumarka laga gaaray hirgelinta Siyaasadda Maareynta Waxqabadka Mideysan ee Dowladda iyo Hannaanka Danabaysan ee Maareynta Waxqabadka Mideysan ee Dowladda (GIPMS), oo Xafiiska Ra’iisul Wasaaruhu hirgeliyey si loo xoojiyo dabagalka, qiimeynta iyo isla-xisaabtanka waxqabadka hay’adaha Dowladda.
— DHAMMAAD —
Cabdinaasir Axmed Bashiir
Afhayeenka Xukuumadda, ahna
Agaasimaha Warfaafinta iyo Xiriirka Dadweynaha, XRW
E-mail: media@opm.gov.so
Tel: +252 771 770 958
